係人都知道「玉樹」係含住金鎖匙出世，雖然佢同大婆台董事關係非淺，不過佢當初加入大婆台時，佢就冇利用呢種關係，反而就好乖仔由低做起，冇話要一步登天做男主角，呢樣嘢關仁都好佩服佢，明明有條易行嘅路佢唔揀，反而揀條難行嘅路。
唔該都冇聲
不過玉樹始終係少爺仔一名，由細被人照顧到大呢家嘢真係呃唔到人，關仁聽聞玉樹有次出席活動時，因為地方太熱搞到玉樹滿頭大汗，有人好心畀張紙巾佢抹汗，點知玉樹唔該都冇聲，抹完汗仲將嗰張滿佈汗水嘅紙巾掉番畀人，搞到個好心人都唔知接好定唔接好，擺明佢少爺仔脾氣，平日連掉垃圾都有人代勞啦。
Textby關仁