華麗嘅聖誕燈飾背後，除咗班每晚擔凳仔、霸靚位、戙晒一支支腳架嘅Pro友外，其實仲有好多入門初哥等住學嘢。與其花五位數字買單反，不如聽吓著名攝影大師水禾田教路，影靚燈飾只須LowEnd相機，毋須大噴口水講理論，Chok一Chok，即時帶出Fantasy效果！
記者：陳國輝
攝影：伍慶泉
Model：Boo@Zmodel
水禾田：慢快門Chok出新意
話明係大師級，水禾田並不像學校老師上堂般，由講解燈光、角度等基礎理論入手！如果你真係入門初哥，要聽住喇！水大師話，影燈飾絕對唔可以落閃燈，而且由於遊人眾多，亦無地方畀你放腳架，簡單嚟講，選擇體積輕巧、功能簡便嘅儍瓜機，已夠你拍攝燈飾。
或許齋拍太悶，水大師再教大家一招即學即曉嘅必殺技！佢話，由於晚間時快門會變慢，當你舉起相機按下Shutter的同時，如果搖晃機身，就會產生非常特別嘅視覺效果。舉例說，如果機身跟住「W」字形移動，影像便出現一條W字光線，又如果將機身自轉，則產生令你暈陀陀嘅旋轉效果，非常有趣！當我繼續追問仲有無其他影燈飾嘅技巧，大師只係講句「用心就足夠」，箇中玄妙，真係未必人人領會！
連拍DC 銀河飄浮
除咗水大師教路嘅入門必殺絕學，呢期仲好Hit拍攝飄浮效果相㖭！呢類相嘅特色係人像會懸浮空中，為捕捉跳起嗰一刻，攝影器材方面必須支援高速連拍功能，等你可以揀一幅啱心水嘅靚相；你仲要將快門速度調高一啲，避免人像產生鬆郁矇問題；另外，如果想效果再Fantasy一啲，不妨裝埋支星鏡，佢可以令每一粒LED產生十字閃嘅效果，相當夢幻！
iPhone照Chok
只要隨手拎起部iPhone，其實已玩到水大師教路嘅Chok機效果。但如果你玩得專業啲，例如加入連拍，又或者想獨立調校快門速度設定，就要入AppStore單撈合適嘅App。舉個例，專玩連拍效果嘅《BrustMode》，就能以每秒24張嘅速度，連續拍攝400張相，另更可設定自拍時間，唔使假手於人；而另一款《SlowShutterCam》，則是專拍攝長時間快門嘅App，佢除咗可控制曝光時間喺0.5至30秒之間，仲可調節曝光補償值正負2EV，提供埋自拍時間掣，一個人玩都無問題。
