陳會長愛駒「玉峽生輝」以前在蔡約翰馬房，曾經表現出色，不過蔡神仙最叻引入年輕力壯嘅新馬，陳會長夠晒大方，唔阻別人威威，於是轉馬房，輾轉去到告大力馬房，上星期三夜馬在跑馬地出賽跑1650米，夠運抽籤配到法國頂尖好手騎師李慕華，此君好似能人所不能，將「玉峽生輝」最後一段衝勁發揮到淋漓盡致，爆出半冷門（十四點五倍）頭馬。陳會長已有好幾年未曾拉頭馬，與太太笑到見牙唔見眼，次日中午與我地在鏞記八樓YungClub食午飯，仍然覺得興奮，佢話：「養馬唔係次次要贏，但久唔久贏番一次，先至有情趣吖嘛！」此乃馬主心聲，養馬長期久拼不出頭，係好氣餒嘅。
今日沙田又有大賽，當然係國泰航空香港國際賽，十二時二十五分就跑第一場，開賽前有不少助興節目，屆時沙田往馬場方向必定塞車，而國際馬壇人士已空群而出，齊集香江，不少遊客為此專程來港。
四場國際大賽之中，香港馬有資格贏邊一場？香港盛產千六米一哩馬王，外來參賽馬往往怕咗香港，故此第七場香港一哩錦標十四匹參賽馬之中，香港佔咗八匹，有機會贏嘅包括5號軍事攻略，8號卡達聖，4號締造美麗，11號人人興旺；外國馬就要睇臨場狀態，睇往績未必可以預測。
第八場係2000米香港盃，本港代表2號雄心威龍肯定係大熱門，港人希望所寄，上屆亞軍5號魔法幻影可以威脅，法國名氣馬天鷹翱翔與英國馬3號諺語甚有名氣，頭馬不出呢四匹。第五場1200米香港短途錦標嘅擂台躉當然係1號馬火箭人，14號日本馬真機伶今年連贏五場，不可忽視，本港馬2號蓮華生輝、4號天久、6號小橋流水可加入戰團。
至於長途賽2400米第四場香港瓶，本地馬水平不及國際水平，只有9號自由好較有威脅，夏佳理今日捧盃一啲都唔奇怪，佢匹10號紅色禮物在墨爾本盃以一個馬鼻飲恨，左丁山都戥佢覺得遺憾，憑此戰績，只有5號馬多利得（墨爾本盃冠軍）夠膽話贏到佢，唔通會係墨爾本盃翻版單Q？如果歷史重演，整個沙田馬場會非常震撼！日本盃冠軍1號始創先鋒可以加入一爭！