大埔聯誼　開夜車

近年人人都話去踩單車，天氣凉更將呢把單車火吹得更熾熱，單車友多去邊度蒲？原來踩不同種類的單車都有不同地頭，今次拜會摺車友，大埔香港科學園就是熱門聚腳地，當入夜，全條吐露港單車徑都滿佈單車，力證小輪摺車已成為港人聯誼的Hot玩意。

記者、攝影：許維雅

海濱長廊風景無敵

現今最多人玩的單車大概分三大類，FoldingBike摺合式單車、MountainBike爬山單車及RoadBike公路單車，三者之中當然以搬運輕便的摺車最受歡迎，所以好多身邊朋友都有部摺車看門口。香港地少人多，公共交通工具又多限制，想踩單車其實並非易事，一班摺車友就道出愛上摺車的原因：「方便囉！帶住部單車去邊度踩都得，摺埋可以搭巴士，但都試過俾司機要求拆轆。相比其他單車，摺車感覺優閒啲，屬聯誼車，有時間就可約埋三五知己到屋企附近踩，一星期兩三晚。一大班朋友踩就一個月一次，通常入大埔踩，大家開始習慣有共同目標。」單車友近年愛以香港科學園作為集合出發點，一來泊車方便，二來地方舒服又有餐廳吃個下午茶先出發，最重要是沿住白石角海濱長廊踩，風景無敵，屬一流的單車路線。

■Barry覺得摺車操控靈活，適合香港人玩。

■入夜後，單車的數目沒減少反增多。

■科學園內的泊單車處亦放滿摺車。

科學園有兩個停車場，每小時$8，星期六、日及公眾假期第四小時開始收$3；消費滿$100，六、日及假日有4小時免費優惠，兩個人坐低在餐廳食個晏就夠數！

款多色靚有型摺車

「工欲善其事，必先利其器。」相信這是天下男人說服身邊人買靚單車的藉口，但無可否認近年的單車款式、用料及設計都講究得多，確實貴得有道理。不過，捨得動輒幾千元買部單車，相信最大引誘同動力都是來自身邊踩單車的朋友，朋友話好自然會跟住買，之後更會上癮改裝單車。好似今次呢班摺車友，大部份都是日本品牌DOPPELGANGER的支持者，款式多、顏色靚、設計型就是DOPPELGANGER的吸引之處。不要以為摺車的款式變化較少，連爬山大輪圈及買餸籃摺車都有，加上價錢中等又有齊LED頭燈及車鎖等配備，的確抵玩。