曼聯意外地在歐聯分組賽出局，是6年來第一次，叫這支上屆亞軍有點尷尬。確實地，以曼聯這個品牌及人腳，無論那方面，都是16強的中堅分子，他們的出局是單一事件抑或有更值得其擁躉憂慮的深層次矛盾呢？
不少專家都撰文分析，雖然我不是紅魔鬼的黨羽，別忘記我的真正身份，一個阿仙奴忠粉，以敵對身份去看曼聯的一切，看他們比賽及從旁觀察多年，也累積了一些看法。
依我看，曼聯的出局很簡單，就是終於暴露了球會各方面的問題出來了。第一，曼聯中場欠缺了一個世界級的中場，像巴塞的沙維與恩尼斯達，像皇馬的C朗，其實自C朗離隊後，想想是誰握住曼聯中路重心？連史高斯都退役了，傑斯也老了，難道你會認為卡域克、路爾斯安達臣抑或湯卡華利靠得住？
第二，成也朗尼，敗也朗尼。朗尼是那種叫人又愛又恨的球員，他會在球隊最需要入球的時候，入個世界波，拯救球隊於水深火熱，但他個人的情緒、狀態又往往帶動球隊的表現，他狀態不穩時，真係見過成隊波踼到慌失失，即使小豆的冒升可以分擔一下工作，偏偏小豆又受傷了。還記得仍有C朗在陣中的曼聯嗎？他與朗尼的入球梅花間竹，那才是曼聯的最佳陣容。
第三，我思疑曼聯唔夠錢使，點解咁講？大家有眼睇，曼聯人腳總係差少少，點解唔買啲好嘢返嚟？英國方面已經幫手做咗統計，過去5年曼聯用在買人的金額8,200萬鎊（約10億港元），比新特蘭還要少，只係高過史篤城少少，咁你話喇，以我觀察，向來唔慳家嘅費Sir當年買入里奧費迪南同卡域克，出手之闊叫人咋舌，明明唔使咁貴，佢係都要畀咁多至高興，但係豪情不再，即係荷包乾涸冇錢使咁解！
都終於有今日了，因為入唔到歐聯16強，紅魔越窮越見鬼喇！哈哈哈！
文：盧覓雪