大班個數碼電台DBC各條頻道陸續啟播，今日會喺工展會開檔賣數碼收音機，大班話最快明年2月先開咪，不過噚日已經好勞氣，指工展會幾乎想冚佢個檔。
事緣DBC租咗個檔賣收音機兼宣傳「大錢台」，打正旗號波馬股乜都有得聽，點知主辦單位指咁搞即係鼓吹賭博，可能唔啱康文署規矩，要求DBC拆招牌，或者用布冚住先開檔。大班得悉後好扯火，大鬧工展會、康文署打壓、審查，既然政府發牌畀佢開電台，點解唔畀佢宣傳！後來有關方面知衰，從善如流，大班話既往不咎，和氣開檔。今日由麥潤壽睇檔賣收音機，據講有個同佢好老友嘅神秘嘉賓會幫襯。