不論新樓舊樓，附近總有起樓、維修嘅日子！問蘇民峰入室弟子——陳譽之：「附近有搭棚動土，好易引發聲煞，直接影響戶主會有頭痛或身體健康問題」，要解決唔難，一棵樹、一張窗簾，馬上將佢K.O.。
記者：朱崇德
攝影：伍慶泉
泰式擺設撞ikea
福來別墅！大圍長久以來豪宅區，打的司機會黑面，$20蚊車程，單程路上落好煩人，不過緊貼下城門水塘後園，在香港實屬罕見的「森林古堡」感覺；四座、三層小平房，74年的低密度豪宅，逾9呎特高樓底，新的所謂豪宅，好難有如此大度！走進B座中層、1,300呎「小」單位，屋主Simon話找來德國設計師癲玩西式撞泰國：「泰式陳設，有好多木器、石器，甚或民族風味事，感覺好Warm、好Raw，不過太多就會有陳舊感覺，加點西化元素，可取得一個平衡點！」唔講未必知，屋內好多家具，係大家見慣見熟嘅ikea貨品，室內設計重點不在花錢，是要你花心思。
關窗黑簾亦擋煞
成間屋紅彤彤，連睡房都玩紅色主調，好多中國人未必接受，陳譽之師傅話：「泰國好多人屋企都係用紅色，係風水問題，絕對影響不大！反之客廳及睡房的落地大窗，剛好遇上工程、搭棚，反而係一個大問題，因為會形成聲煞！對屋主身體健康有好大影響，會造成偏頭痛！」要對付唔難，一般師傅會教你關起窗口，拉起黑色窗簾就萬事大吉，不過窗外對正「城門森林」靚景，Simon感覺總有點捨不得：「都有另一個方法，就是床頭向窗位，在你床頭位置附近，種植一棵大葉類植物，當你躺下時需透過葉隙才可看到窗外，這亦可以化解煞氣！」
