特首豬狼對決，勝負難料，八方唔敢落注，但係可以爆啲料，唔多唔少大家或者睇到些少端倪。八方噚日中午返工，竟然見到狼振英喺佢嘅競選辦主席張震遠陪同下現身堆填區壹傳媒大樓，原來係應《壹週刊》高層邀請嚟食晏，社長楊懷康等多名高層在場歡迎。
梅菜扣肉食唔停
據講CY今次已經係第三次深入堆填區，而佢多年來始終如一，每次去五樓VIP房食飯，都對梅菜扣肉呢味家常小菜讚不絕口，次次食唔停，肥膏、油膩，統統冇有怕。CY同唐唐嘅對決被形容為豬狼大戰，原來佢咁鍾意食豬，至於最後邊個食邊個，八方唔知，但可以預見狼一定會咬住豬唔放。
星島何柱國前日開記招勁寸CY，佢噚日話大家仲係朋友，但遲啲會一次過辭晒包括星島在內所有公司董事職位，前日一句公道自在人心回應同星島嘅糾紛，噚日佢就玩封嘴，張震遠反而睇唔過眼，話前日都有睇記招，覺得何態度有啲囂張。