馬會聽日舉行獎金6,800萬元嘅「香港國際賽事」，有26匹過江龍同本地薑比賽。馬會獸醫部門主管李恪誠（ChristopherRiggs）話，海外馬嚟自歐美澳星等地，無錯係坐咗好耐飛機，但jetlag問題好快消失，馬迷咪以為佢哋會蝕底畀本地馬。
特首沙圈攞貼士要北望，真正跑馬仔，八方寧願問李醫生貼士，佢指流眼水、流鼻水固然代表唔尋常，但仲可以睇對耳，「如果豎起來，代表牠很精神」，所以隻馬垂頭耷耳，可能係無乜雄心鬥志。
另一要留意係隻馬會唔會成日擰轉頭望吓個肚，因為咁樣好大可能係個肚唔舒服；若果出現埋「撩」前蹄動作，更可能係「絞腸痧」，要趕去做手術。舊年「蓮華生輝」準備上機去日本參賽時，就係因為咁即刻送返沙田馬場開刀，救番一命。
馬會獸醫團隊有70人，睇晒香港1,200匹出賽馬同600匹騎師學校馬匹，馬匹醫院設備齊全，明年將新增磁力共振。