唐英年呢個月19日宣佈參選，會喺灣仔會展搞「大堆頭」造勢大會，屆時「支持唐英年」嘅口號一定嗌爆咪，嘈到拆天，但相反唐唐家吓落腳嘅「豬竇」競選辦公室，氣氛幽靜兼神秘，似間鬼屋多啲，訪客全部都要肅靜兼迴避，唔知真係以為自己去咗……。
幾日前，唐唐嘅公關大員陳慧兒，相約傳媒高層噚日去灣仔美國萬通大廈嘅唐唐競選辦同唐唐會面。呢幢大廈係華置嘅總部，所以競選辦擺喺呢度唔出奇，事關華置副主席劉鳴煒係唐營核心，經常同唐唐跟出跟入，為唐唐護駕。如果第時唐唐做到特首，劉鳴煒絕對行情看漲。
保安把守升降機
唐營競選辦位於六樓，部升降機，誇張啲講句係重門深鎖，竟然有保安把守。八方噚日一入，問咗保安阿哥一句：「唐英年嘅辦公室係咪喺六樓？」點知保安大哥一聽到，就即時耷低頭、壓低把聲，叫八方唔好咁大聲：「……呢度唔講得㗎，唔好畀其他人聽到。」嘩！八方嚟競選辦，唔係嚟中聯辦或者港澳辦喎！搞咩咁詭秘。
去到六樓，八方發現無任何水牌寫上「唐英年競選辦公室」，聽聞唐唐咁樣做，係因為一寫「競選辦」三粒字出嚟，可能涉及要計算選舉經費，所以唐唐一日未宣佈，都唔可以掛個招牌出嚟。
唐營職員無片派
六樓有個會議室，入面有電視同枱，佈局簡單，唐唐就喺度見傳媒，而另一邊就應該係唐營嘅辦公室。八方本嚟想入去參觀，睇吓入面格局係點，但係唐唐公關話noway喎。
除咗冇水牌、冇得參觀之外，受聘於唐唐嘅職員，暫時連卡片都冇，唐營公關大員、前電盈公關Jenny馮話，家吓未有卡片派。呢個競選辦，人與物恍如呢排天氣咁樣凍冰冰，氣氛神秘。
八方經過一番「唔得」、「唔畀」、「唔可以」嘅對待後，全日最Warm莫過於感受唐唐老婆郭妤淺出品嘅藍莓Cupcake，味道無咩缺失，相當唔錯。
mailto:[email protected]
