多年嚟，CD主導唱片市場，直至iTunes出現才令數碼音樂成為新主流。但一句到尾，發燒友始終對HQCD、AQCD等靚聲媒體難捨難離，想佢哋割愛換畫，唯一途徑就係要超越CD！韓國品牌aurender，新出參考級數碼播放器兼儲存系統，其40磅鋁合金外殼唔單止達到高級Hi-Fi的降諧震要求，音色更升頻上24bit/192kHz，甚至超越傳統CD嘅界限。
記者：陳國輝
攝影：伍慶泉
Model：Haily@GME
母帶直錄 超越CD音域
自出世30年來，CD爆發過數次「革命」，例如新研製嘅HQCD，佢除咗標榜高清音色，並將細節上每一粒音從「無」到「有」，畀發燒友慢慢品嚐之外，還有XRCD，佢將JVC獨門絕學K2Mastering融入製作，提升原音味道。但講到底，終極製品還是一張12厘米嘅拋光面CD，音頻取樣率局限於16bit/44.1kHz，想突破極限，唯一方法可能係轉用另一類新媒體。
今次訪問咗專業唱片錄音工程師兼監製KentPoon，佢曾參與多項唱片Mastering製作。佢解釋，CD仍然係市場主流，但傳統CD唱盤始終有自身問題，例如機械零件震動時會發出噪音，對音色肯定造成干擾；而局限性取樣率也無法將母帶嘅原汁原味發揮出嚟！阿Kent話，數碼播放器及儲存系統最大好處，係佢屬於一部獨立裝置，可降低零件發出嘅噪音之餘，更可將未壓縮嘅高清原母帶音樂檔例如WAV，直接抄到S10或A10，其最大取樣率可高達24bit/192kHz，論層次感以及動態範圍兩方面，相等於24bit母帶直錄效果，比傳統CD音域更闊。
iPad遙控 卡拉OK點歌
要玩高清原母帶靚聲，接駁及設定唔係事必複雜，aurenderS10就類似一部MusicServer，可以透過USB手指或電腦Wi-Fi，將啲近1GB一首嘅高清數碼音樂放晒落去。最重要係介面好User-Friendly，操控就靠人人都識、周街玩緊嘅iPad！首先到AppStore免費單撈遙控App，啟動後，主畫面上會見到一大堆唱片封套，左邊係已選歌曲Playlist，你仲可以插播、跳播，用落熟口熟面，感覺其實就好似卡拉OK點歌咁，越玩越過癮；而每當有新歌抄入aurender之後，只要喺iPad上選擇Scan一次，新嘅CDCover就會自己彈出嚟，隨時簡單到小朋友都曉用。
最值得一提係，抄寫嘅方式Easy到你唔信，原來只須事前將已抄低音樂嘅USB手指，直插到aurender機背USB槽，隨即便自動抄寫。筆者當日實試，一隻大概2GB的USB手指，抄音樂到S10只係花咗40秒便完成，爽快程度直逼高規格電腦再搭USB3.0咁先進。
40磅鋁合金殼降諧震
比較一般高級音響，aurender機身相對小巧，但外殼採用40磅鋁合金製成，加上獨立電源隔離，除咗夠硬淨耐用，最緊要係保護到敏感零件從電磁噪聲以及震動組件上發出，大大降低諧震產生嘅不良反應。另外，aurender機面亦配置兩組AMOLED液晶屏幕，隨住音樂旋律而變化嘅指針式顯示已夠經典，你更可選擇用冰藍或橙黃色作為背燈，甚至改為正在播放嘅歌曲顯示亦可，算係花臣多多。
60萬瑞士喇叭襯托
紅酒要配靚音樂乃屬份內之事，夾上參考級aurender，喺KentPoon監聽室內我哋仲發現一套超豪音響，加埋晒埋單接近一百萬！呢批裝置包括18萬WeissMedea+旗艦解碼器，其最大取樣率達到32bit/192kHz；而售價約60萬，也來自瑞士嘅KlangwerkElla喇叭，就採用窄長而灰白色外觀，並由著名建築師Markus操刀設計，佢採用3個5吋低音單元圍繞正中心嘅高音單元，成為PointSource同軸發聲點，藉以獲得更佳準確度。
數碼音樂越嚟越流行
「數碼音樂發展至iPhone等智能手機，技術已相當成熟，問題反而係MP3、AAC等經壓縮嘅格式，明顯有Loss情況；但係，我就相當睇好高清數碼音樂，覺得高級Hi-Fi也可透過aurender等數碼播放器及儲存系統，發展出比CD更佳嘅音色，只待普及而已。」
aurenderS10
主要功能：2TSSD固態硬盤播放、內置數碼主時鐘、支援24bit/192kHz取樣率、iPad用戶介面、獨立電源隔離、Linux操作系統、無風扇低噪設計、AMOLED顯示器、直接從NAS讀取播放
售價：$45,000
查詢：方浪音響（35639545）