馮仁昭四圍超:張舒雅迷魂箍啜實男友 - 馮仁昭

馮仁昭四圍超:
張舒雅迷魂箍啜實男友 - 馮仁昭

當選08年港姐冠軍嘅張舒雅經常俾人話係最hea港姐,雖然佢嘅工作態度備受質疑,但做女朋友真係一流,前晚佢被發現同科技公司老闆男友Samuel喺銅鑼灣行街,狂施冧招向男友投懷送抱,連shopping買嘢都自己畀錢,成為最佳女友當之無愧。

雖然有唔少人喺附近,但張舒雅一於少理,突然攬到男友實一實,非常肉緊。

08年港姐冠軍張舒雅與男友情到濃時深情一吻,連眼神都變得集中。

張舒雅家境不俗,買嘢都自己畀錢,唔使男友煩。

畀錢唔靠男友

前晚8點幾,素顏着黑衫嘅張舒雅同男友喺銅鑼灣世貿廣場行街,兩個人去到無印良品嘅零食區,雖然附近好多人行來行去,但張舒雅一於少理,突然停低轉身用雙手箍住男友條頸,Samuel雖然年過40歲,但對女友嘅熱情顯得好受落,隨即攬住佢條腰,嚟個自轉,好似喺舞台做騷一樣,完全陶醉二人嘅浪漫世界。
之後張舒雅同男友繼續行街,沿途手拖手兼有講有笑,兩人行到悶悶哋又嚟個深情一吻,認真癡纏。之後佢哋去到護膚品店買嘢,可能因為張舒雅本身都係有錢女,所以畀錢唔使靠男友,寧願自掏腰包,之後兩人去咗附近食肆晚膳後先離開。