圈中大肚生仔熱，歌星組、電視圈同樣興旺。朱麗倩、陳慧琳證實陀B、楊千嬅未公開，樂基兒疑似有喜，鄭秀文（Sammi）昨日出席活動，則反浪潮表明自己無意生育，生仔衝動更越來越冇，同場的陳寶珠則不敢催新婚的兒子楊天經生，只是熱烈表示願意湊孫。
陳寶珠和鄭秀文昨日在海港城出席香港血癌基金活動，陳寶珠向Sammi送了一部平板電腦，推介血癌apps，兩人在台上有傾有講。Sammi消瘦了不少，變成紙片人，她直認頻撲消瘦：「去咗美國登台，好辛苦，瘦咗六磅，等我做埋澳門站，遲啲去北京同古仔（古天樂）宣傳，就可以大食特食，除咗塑膠同鐵，乜都食呀！」
同安仔齊封口
問到愛郎許志安有否心痛？Sammi說：「佢為演唱會積極減肥，冇得一齊大吃大喝仲好，我哋一齊封嘴，有個伴。」不過Sammi甜蜜透露，安仔吩咐她完騷後，記得先行大啖美食。聖誕節男友要開工，問她可會炮製浪漫聖誕節目，她說：「不嬲都冇，我個人鍾意浪漫，但唔識浪漫，死古古，冇心思㗎。」近期歌星圈中捲起生仔熱潮，Sammi謂有恭喜劉德華：「有傳咗短訊畀佢，畀啲空間佢哋啦，等我幫你哋問埋。」
問會否趁熱鬧生仔，Sammi說：「我冇打算生，毫無衝動，越來越冇，冇諗過做媽咪。人生每個人都要完成嘅角色唔一樣。不過我有保留，除非上帝安排我生啦。」不生仔要好小心，她即鬼馬哈哈笑說：「我唔答，你哋曳曳！」
寶珠請纓湊孫
陳寶珠兒子楊天經早前註冊結婚，問寶珠可想快點抱孫？她即說：「好隨緣，不過我湊㗎，我湊㗎！」她謂不會催生：「龍BB冇咁快，下年4月我要做十幾場粵劇，暑假佢又擺酒。」
採訪：盧妹
攝影：陳慧安
