近年不少藝員紛紛離開無綫向外闖，北上狂賺人仔，陳鍵鋒（Sammul）便是其中一人，不過他近日抽空返港為港台劇集宣傳，Sammul坦言已適應內地拍劇生活，習慣較慢的生活步伐，反而回到香港感覺有點不協調。
陳鍵鋒在港台劇集《廉政行動2011》中飾演高級調查主任，與扮演其下屬的吳雨霏（Kary）合作得很開心，今次難得與前輩曾江、潘冰嫦、高志森、盧海鵬、鍾景輝等合演，感到無比高興。
Sammul形象健康，甚受紀律部隊歡迎，例如ICAC、警察、紅十字會等等，他笑說：「係㗎，大部份fans都鍾意我着制服或者西裝呢類嘅造型。」小時候的志願有否想過做紀律部隊？Sammul竟表示想做獸醫：「我鍾意小動物，但大個咗，心諗點解唔去救人而去做獸醫，但我又唔會做醫生，我接受唔到做手術工作。」他笑言做藝人可以經常演繹不同角色。
向前輩偷師
近年經常在內地接劇的Sammul，早前與唐嫣合演《亂世佳人》。講到他賺到豬籠入水，Sammul坦言最重要是機會：「始終平台唔同，呢幾年好咗嘅原因係我適應內地市場、生活節奏，我返到香港反而唔慣，例如去超級市場會講國語，呢啲幾得意！」
至於Kary則飾演需要講大量專業用詞的廉署調查主任，她笑說：「我中文又唔好，好多專業用語都要不停背，好彩有陳鍵鋒做拍檔。家睇番劇中自己嘅造型真係好唔慣，平時邊會着得咁端莊同染一頭黑髮。」今次演出需要跟前輩曾江有對手戲，問到是否壓力很大？她說：「大呀，好彩我唔係太多NG，可以同咁有份量嘅前輩做對手戲真係學到好多嘢。」一向以唱歌為主，Kary亦希望參與電影或劇集演出，問到若果沒有踏足演藝界，會否任職公職工作？她說：「我真係有咁諗，若果唔做歌手，我真係會做類似工作，行出嚟幾有型、幾專業。」
採訪、攝影：黃曉妍、馬建華
