無綫台慶頒獎禮出爐最佳女配角陳敏之，噚日接受商台電話訪問時仍然好興奮，佢話：「得獎當晚返到屋企睇到有4、500個留言，加埋朋友傳畀我睇嘅得獎片段，我喊得仲厲害過喺台上。我當晚好亂，連契姐伍詠薇都唔記得答謝。」經歷咗去年身體最差嘅時間，敏之再苦練10年演技得獎，覺得係合適時間。至於幾時問鼎視后，佢就話要再磨練下。