阿仙奴中場韋舒亞因傷今季一直養傷，但呢位19歲小朋友冇波踢一樣新聞多多。韋舒亞早兩日喺自己Twitter度公開話要賭番自己隊波阿仙奴，用10鎊買隊友費林邦喺對奧林比亞高斯場歐聯開「首名入球」。贏唔到錢事小，韋舒亞咁做係嚴重違反歐洲足協嘅賭博條例，家隨時被追究惹嚟一身蟻。
費林邦夠冷落120蚊支持
韋舒亞早排做完老竇，不過唔代表個人夠成熟，求大俠建議佢得閒真係要去睇吓個腦囟生埋咗未。禮拜二晚歐聯阿仙奴作客奧林比亞高斯之前，韋舒亞喺佢個有過百萬「粉絲」關注嘅Twitter度話，賠率有成150倍嘅費林邦「首名入球」相當吸引，值得落10鎊（約122港元）支持吓。
韋舒亞因為足踝受傷到家都未喺今季正式比賽上陣過，雖然禮拜二阿仙奴1:3輸畀奧林比亞高斯場波佢冇份踢，但落注去自己效力嘅球隊，始終係違反咗歐洲足協有關球員賭博嘅條例。當場波踢緊兩隊仲係0:0嗰陣，費林邦一次射門中咗網側，韋舒亞即時唔識死咁喺Twitter留言：「費林邦差啲幫我贏番多少使費。」
同樣冇喺場波上陣嘅阿仙奴門將施捷斯尼都有加入戰團，留言去揶揄吓韋舒亞，叫佢唔好掟錢落鹹水海，買龍門法比安斯基贏錢機會仲大喎。最後連費林邦賽後都問吓，買佢自己「首名入球」賠率有幾多。
有關留言已全部刪除
可能韋舒亞都知衰，冇耐之後就已經將有關留言全部刪除晒，而其實費林邦喺嗰場波嘅「首名入球」賠率亦冇韋舒亞所講嘅150倍咁冷，大約係25倍左右。希望呢單嘢唔好因為一時貪玩搞到後患無窮就好。話晒韋舒亞預計出年初就復出，有咩麻煩事領隊雲格就頭痕。
遠嘅唔講住，近嘅都夠雲格煩。事關阿仙奴陣中嘅左右後衞傷得嘅幾乎都傷晒，安德里山度士對奧林比亞高斯傷埋之後就更加缺閘（據報要唞3星期）。聽晚主場迎戰愛華頓，雲格又要安排啲中堅球員客串做左右後衞，同埋會將17歲仔安夏升上1隊，話唔埋呢位小朋友可以乘勢跑出，好似師兄韋舒亞咁，成為另一位年紀輕輕就上位嘅後生仔。