35、24、39，唔好心邪，我求大俠唔係講緊模三圍，或者今晚開嘅六合彩冧巴；而係講緊巴塞隆拿周二對巴迪嘅歐聯分組賽，所起用嘅大冧巴B隊球員。不過就算用小將，巴塞都仲可以4:0大勝，周六用番強陣作客皇家馬德里，都咪話摩連奴唔驚。
巴塞已經篤定H組首名出線，為咗留力國家打吡戰，理所當然收起主力，正選陣容除咗翼鋒柏度洛迪古斯，中場堤亞高艾簡達拿等4名一隊成員外，大部份都係B組成員，正選平均年齡只係22.7歲，可以話係「BB隊」。特別值得一提，就係前鋒拉芬夏（Rafinha），呢位身穿34號嘅18歲小將，係堤亞高艾簡達拿嘅胞弟，亦即同樣都係前巴西國腳馬仙奴嘅優良產品，馬仙奴一門雙傑，真係飲得杯落。
「BB隊」都贏4:0
由前南華前鋒基士文任後備嘅巴迪，原本以為對住呢班巴塞B隊，仲有啲勝算；點知呢班「巴塞BB隊」嘅地面組織一樣唔講得笑，全場控球指數高達7成，射門次數亦一面倒，主隊達19次，巴迪只得兩次，而且兩次都唔中龍。
結果「巴塞BB隊」由沙治羅拔圖（SergiRoberto）同托拉爾保（Torralbo）各建一功，「老大哥」柏度洛迪古斯下半場梅開二度，大勝4:0，[-2]都開「主勝」。巴迪吞4蛋，加上柏辛域陀尼亞2:2逼和AC米蘭，巴迪連歐霸盃資格都冇埋。
哥帥：一早知佢哋勁
取得執教以來第150場正式比賽勝仗，教練哥迪奧拿賽後好風騷咁講：「我叫佢哋喺陣上盡量找尋樂趣，大勝嘅戰果冇令我意外，因為我一早知道佢哋嘅威力。」不過哥帥嘅主戰場，始終都係周六作客皇馬，哥迪奧拿話：「皇馬一向都係強，今年都唔例外，不過我會好好休息一晚，聽日先諗點對付佢哋。」