任賢齊很久沒有出碟，今次請來台灣人氣最強的音樂組合五月天做幕後製作，他們惺惺相惜，互相尊重，不過一講到音樂，卻各執一詞，變得勢成水火，小齊說：「佢哋（五月天）真係儍儍哋㗎！」
近日五月天為任賢齊度身訂做的最新專輯《不信邪》，也是五月天眼中小齊的真個性。五月天出道至今，對音樂的執着態度令人動容，亦是他們成功之道，連小齊都甘拜下風。
注入新元素
小齊說：「今次搵佢哋幫我做專輯，因為佢哋同我好熟，又聽過我嘅歌，五月天又係家主流，佢哋就好似將一個有歷史嘅名牌，重新注入新元素，不過呢隻碟真係做咗好耐，由構思到錄音幾年時間，overbudget得好緊要。」
對於一個生意人來講，時間和品質是要平衡，但是音樂人根本沒有這種概念，小齊說：「本來有好多歌係已經有90分，但係五月天一定會話『齊哥，我哋係可以做到一百分』。」
錄音四圍飛
於是五月天不停追住小齊，飛來飛去，目的就是錄音，小齊說：「佢哋真係儍儍哋，寫咗幾十首歌畀我揀，乜都要做到最好，有一個幫我填詞嘅人入咗醫院，打畀佢都唔係問候人，係追歌詞。」
小齊續說：「專輯入面其中有首歌係《傾城之淚》，係一套戲嘅主題曲，呢首歌有廣東話和普通話夾埋，錄咗七個版本，仲要係最lastminute先交貨，不過同佢哋做呢隻碟，令我搵番嗰一團火，和對音樂熱情。」
採訪：楊潔雯
攝影：陳慧安
