中電（002）主席米高嘉道理丁母憂，噚日喺報章刊登訃聞。嘉道理老夫人Muriel喺12月5日（星期一）辭世，享年96歲，係笑喪。訃聞所見，嘉道理老夫人除咗仔女孫兒，仲有三名曾孫，四代同堂，可謂福壽雙存。
員工未聞死訊
老夫人喪禮將會以私人形式舉行，家屬婉謝鮮花悼念，稍後將會公佈追思會嘅詳情。
嘉道理係香港數一數二大家族，亦係各大富豪榜常客，旗下有多家上市公司，喺旺角嘅中電總部，噚日就下半旗致哀。華華見到幾位着住中電制服嘅員工喺辦公大樓走出嚟，佢哋都話，唔知老夫人離世嘅消息，而辦公室入面亦冇特別擺設，氣氛同運作一切如常。同屬嘉道理家族旗下嘅半島酒店，就冇下半旗。
李華華
mailto:[email protected]
