巴塞隆拿「小白」恩尼斯達（圖）出晒名念舊，星期一俾傳媒發現佢用咗42萬歐元（約326萬港元）入股母會阿爾巴塞特，仲即刻注資100萬歐羅。佢做咗最大股東之餘，老竇仲做埋副會長。家阿爾巴塞特喺西丙排第6，有「小白」大力支持，睇嚟阿軍升班只係遲早問題。
而周六國家打吡，皇家馬德里就大搞噱頭，搵咗著名皇馬粉絲、西班牙網球手拿度，同埋一班有份贏今屆台維斯盃嘅球員嚟做開球禮嘉賓，開波之前贏咗個勢先。不過西班牙一間水族館又搵咗隻叫美斯嘅八爪魚，預測邊隊會贏。美斯一開始揀咗巴塞，之後又有隻爪掂住皇馬個樽，咁係咪即係會和波咁解？