那些年，佢同碧咸、史高斯同堅尼喺曼聯踢波，仲俾領隊費格遜點名稱讚；但今年，佢因賣賊贓而被判入獄15個月。究竟邊個曼聯球員咁慘？咪就係禾獲克（RonnieWallwork）囉。
青訓產品細會浮沉
34歲嘅禾獲克喺曼聯青訓出身，效力咗5季喺02年夏天離隊，之後踢過西布朗、巴拉福特、班士利、哈特斯菲爾德等。佢喺08年退休轉行做生意，可惜投資失利又負債，最終令佢諗歪咗去犯法。聽英傳媒講，警方早排喺調查幾宗械劫案時，無意發現禾獲克喺網上出售嘅VolkswagenTouran引擎同BMW318i嘅部份零件係來自失車，而佢揸緊嗰部MazdaFurano係非法得嚟，於是將佢拘捕，仲以賣賊贓罪名起訴。估計啲汽車贓物，價值43,000鎊（約54萬港元）。
同期魔兵霉過梅菜
禾獲克前日出庭受審，證據確鑿而被定罪，但佢喺庭上一啲悔意都冇，結果個官就重判佢入獄15個月。法官西蒙紐維爾仲咁樣批評佢：「你有嘢做又有家教，應該識得點樣控制自己，你真係好對唔住自己。」
禾獲克初出道時，費格遜對佢評價甚高，不過費Sir話佢搵唔到自己嘅最佳位置，令佢停滯不前，最後黯然離開。話時話，同佢同代嘅魔兵好似係古堅、希堅保咸、米高奇治、格寧同居迪斯咁，都係雷聲大雨點小，發展平平，得番希堅保咸可以繼續留喺英超踢史篤城後備，其餘唔係退休就係喺低組別比賽。
另外，曾因車死人而入冊嘅諾士郡前鋒李爾曉士，因喺間酒店度伸隻手入個女人條裙而被捕，我求大俠未清楚佢有冇非禮人，但若然係事實，只好嘆一句佢真係死性不改。
捧過英超 西布朗最佳
禾獲克效力曼聯嘅時候打中場，喺95/96球季當選紅魔最佳年輕球員，本來前途無限，結果好快上咗A隊，仲喺99年球隊喺日本捧洲際盃嘅成員。喺00/01球季，佢全季踢咗12場，夠資格攞個英超冠軍獎牌（圖）。而佢離開紅魔後雖則再冇捧盃，但就喺04/05球季成為西布朗嘅最佳球員。
