潮媽陳慧琳（Kelly）懷第二胎，繼續開工賺奶粉錢。她昨日陀住約五個月身孕，穿平底鞋宣傳護膚品，一向恨女的Kelly透露腹中是男嬰，大仔劉昇叫蝦餃仔，今胎二仔叫小籠包，配合龍年出世。她又謂不急住追女，「最緊要穩穩陣陣！」
陳慧琳昨日懷住五個月身孕，在金鐘簽約成為內地兒童護膚品「青蛙王子」代言人。Kelly穿上平底鞋及MarcbyMarcJacobs露肩裙，手腳微胖，肚子也凸出，不過品牌總裁致辭時，竟錯將Kelly稱為陳慧琳先生，大會又怕Kelly凍親，寧願關了全場冷氣。
15分鐘賺百萬
自言體重上升了八、九磅的Kelly，拒絕透露預產期，她表示怕悶，不會坐在家中安胎：「唔會正式收爐，喺屋企好悶，呢啲活動好簡單，一兩個鐘頭。我平時都有做瑜伽伸展，唔可以淨係坐喺屋企。」問她老公有否禁止她開工，她說：「日日坐屋企真係好悶，如果可以坐住錄歌仲好。」事實上，Kelly昨日只是露面15分鐘，就穩袋上百萬，奶粉錢賺得輕鬆，她更承認連平底鞋都有贊助。
今胎陀得舒服
Kelly證實胎中是男嬰，她說：「叫小籠包，因為龍年，又唔想叫佢燒賣。」她謂今胎陀得舒服，飲大量牛奶，食炸兩、麥皮、粥，她說：「冇嘔，食得瞓得。」提到千嬅有喜、樂基兒也疑似有喜，Kelly笑着說：「恭喜華仔，同千嬅、樂基兒可能就要大家爭床位，爭完床位爭學校，好彩我生先。」改名方面，她笑言未諗到：「又唔可以叫劉華，要畀番劉德華專用。」問她蝦餃仔知道有弟弟未？她說：「未知，佢係最遲一個先知。」Kelly一向恨女，問她可會努力再追？她說：「搞掂呢個先啦，最緊要穩穩陣陣！」
採訪：顏英儀
攝影：陳慧安
