唔經唔覺又到年尾，雖然秋去冬來，但近嚟芒果依然當造。唔係講緊生果，而係強勢加入智能手機戰場嘅WinPhone7.5Mango。繼Rader後，HTC再派出旗艦Titan力撐Mango，叫得巨人族泰坦，由4.7吋巨Mon到F2.2光圈大眼，又真係乜都巨過人！
記者、攝影：韓繼聰
巨Mon好㩒 大眼影靚相
叫得做Titan，當然係咩都要夠大先襯得起個咁「霸道」嘅名。4.7吋WVGA480×800大Mon，Size夠晒大之餘，色彩亦都非常鮮艷明亮，無論睇片睇相效果都相當好，包你睇得舒服。娛樂之外，大Mon亦方便你處理文書、簡報、睇網頁等，唔怕望住字海睇到眼都矇。加上支援超大虛擬鍵盤，WhatsApp、覆Email自然更快更順。一般手機好少會標明鏡頭嘅光圈值，但Titan就打正F2.2大光圈做賣點！再加上手機少見嘅背照式感光元件，無論影淺景深沙龍靚相，定係喺低光環境下影相，相片質素都比一般手機好。實際試影，鏡頭像素雖只有800萬，但影像清晰銳利，景深效果明顯，甚至有埋人臉辨識，絕對比一般手機更優勝。
9.9mm金屬巨人
平面睇，Titan比iPhone4足足大成個碼，不過講到只有9.9mm厚度，同iPhone差不多一樣，相形之下更見纖薄。一般機身底殼都比較細，只用作覆蓋電池機底，但Titan的底殼則比機身更大，包裹整部主機。加上採用鋁合金製造，感覺份外保護安全，手感亦相當好。做得旗艦級當然唔嘢小，1.5GHz處理器比諾記首部芒果Lumia800的1.4GHz，還要快多100MHz。實試吓，無論開Apps定睇片，處理都非常快速，完全唔使等，而捽芒就更加係順到無倫，操控感覺一流！容量方面，內置16GB算基本配備，但無得另外插卡，大咬玩家都要慳住用。
HTCTitan
處理器：1.5GHz
平台：WindowsPhoneOS7.5Mango
記憶體：內置16GB512MBRAM
屏幕：4.7吋（480×800）
售價：待定（預計12月推出）
查詢：HTC（35201234）
