自己識慳油　FamilyMan也狂野

提起越野四驅車，怎會忘記老大哥三菱，不知老大哥是否已過了少年輕狂階段，是時候轉新形象，不只要攀山涉水，還要以家庭車甚至八人車出現，立即親民好多！DelicaD:5打破四驅就是嘥油定律，注入不少環保元素，油耗較純兩驅不加反減，且獲政府認可環保車資格，幫你慳唔少，由不羈男變FamilyMan。

記者：趙慧敏
攝影：周旭文
Model：Rainbow@Zmodel

自動選擇兩驅或四驅

雖說是家庭車，但在眾多三菱旗下車款中，DelicaD:5絕對是最原汁原味保留四驅越野DNA的一款，單是高頭大馬的車身，擁有4,730×1,795×1,825mm體形，加上鬼面罩一排電鍍鋼牙，在一眾MPV中，氣勢經已拋窒同級對手。記性好的三菱Fans，應該記得第一代Delica於1968年面世時，就以商用車形象出現，當年有個大尾斗，為載貨周圍走，不過今時今日點計都是豪華及性能兼備的八人MPV。
第五代Delica已出現一段時間，雖然個樣一啲都唔Out，不過都是時候玩玩新意思，重點不是外形是性能！過往DelicaD:5只屬前驅，玩味一般，等到頸都長，代理終於引入四驅版，屬兩驅四驅調控，可自行按入不同模式外，仲有個Auto功能，按行車時不同狀況調校兩驅或四驅，目的當然是慳油之餘，偶然行經崎嶇山路一樣搞得掂，不用自己動手切換行車模式咁麻煩。

■第一代Delica屬商用車。

放平座椅如大床

以MPV來說，DelicaD:5外形無疑比同級車款更粗獷硬朗，尤其是車身離地較高，家中長輩或小朋友可能稍嫌上落麻煩，不過一組雙電趟門多少彌補這方面的缺陷。車廂亦有不少貼心配件，例如前後排獨立空氣調節及三組天窗等，而摺叠第二三排座椅後，不只可騰出大量載物空間，將座椅放平，又會變身超大床鋪。
咪以為揸部大牛龜會減少駕駛樂趣，事關操控有不少新設備，如加減波撥片、行車電腦會同你計油耗量、平時車速甚至幾時入油都會提你。雖然車重足有1,792kg，負磅不輕，但勝在扭力強，於4,100轉已釋出226Nm扭力，擁有170匹馬力，就算用來攀山涉水都完全無問題。