最低工資生效，大家樂（341）主席陳裕光嗰句「33蚊就要發盈警」俾人圍插，佢有幾次忍唔住同華華講，覺得自己無辜。1984年入大家樂，89年任行政總裁，97年出任執行主席，做咗當家咁多年，陳裕光今年初事先張揚，話自己60歲人，做埋今年退休，仲強調唔係俾人插到心淡要走。噚日大家樂公佈，陳裕光明年4月1日起調任非執行董事兼繼續做主席，首席執行官就交畀家族成員、總裁羅開光接手，安排符合市場預期。
尋找生意第二春
陳裕光之前同華華講，為咗今次接班，年初專登請咗財務總監返嚟睇檔，上個月公佈業績記者會，仲帶埋佢出嚟打招呼。不過，陳裕光強調自己唔係全退，未來會繼續為大家樂出謀獻策，同埋做公司「吉祥物」──即係以發言人身份見傳媒。至於多出嚟嘅時間搞乜？佢話，想搵生意上嘅第二春，但就唔會從政。