由PS2嘅《Z高達DX》開始，腦龍等了又等，一心求組隊同㗎仔死過，點知跟手續作出晒喺PSP度。相信好多打開街機嘅朋友，都極度期待今次回歸家用機嘅《VS系列》，仲話有成60部機，加上日本定價高上8,800日圓，所以大家預咗到港後必會出現「鑊氣」，只係炒得有幾燶咁解啫。上周五正式派貨，信和大部份標約$640-$680，只比官方定價稍稍提高幾草嘢，已算是「良心價」了，同一商場，就有Game舖定出$750黑心價！
順帶一提，市面上亦有韓國版出現，只賣五百零蚊，好多機迷以為執到筍嘢。雖然韓版一樣可以同日版連線對打，不過DLC就麻煩得多，好似首批送嘅特典機體Hi-ν咁，就要專登開番個韓國PSN先可以單撈。小事？嚟緊仲有其他新機體、新模式DLC，喺香港分分鐘玩唔番，奉勸大家都係咪貪小便宜。
玩咗幾日，大電視加JoyStick，當然勁有街機Feel，唔似手提版到喉唔到肺，網絡對戰順暢，就算Network「着紅燈」，一樣無問題照打，但有少少缺點不吐不快；不設等候大廳、無得組隊挑Host機，最難受係不設藍芽通訊。唉，《VS系列》最講默契，打街機必定互相報料報血，家陣無得陣上溝通，果真是沉默是「甘」，係被人打鑊甘個「甘」呀！