年尾新盤混戰，長實（001）同新地（016）鬥推大盤爭客，賣樓負責人少啲EQ都隨時壓力爆煲。
近日長實大圍盛世俾新地將軍澳天晉㩒住嚟砌，聽講搞到盛世揸盤人郭子威，向代理阿頭開火。
日前就有一段疑似郭生抦代理嘅錄音喺代理界瘋傳，段錄音超過兩分鐘長，內容主要鬧各代理行主區阿頭，話成個新界區超過3000代理，喺沙田大圍、馬鞍山大埔，都搵唔到人睇樓，「呢啲係乜嘢水準呀，冇資格喺度做。」可惜華華搵唔到郭生求證！
傳授過盤搶客招數
江湖傳聞，早排長實賣將軍澳領凱，初頭唔係好得，揸盤人一樣係咁鬧代理。新地超高價推天晉，嚇窒買家，代理一樣成為出氣袋。
代理生涯「有奶便是娘」，俾人鬧已習以為常，不過段錄音某啲字句，好似「不知所謂嘅人，去人哋個盤度，好似狗咁『囈』人哋啦！」就有啲過火。
此外，江湖又傳出，美聯物業住宅部下個月一號會大地震，初步聽講，布少明會取代陳坤興成為住宅部阿頭，歐沚軒就坐布少家新界區個位。郭玉滿會取代何銘培睇晒九龍區。
李華華
mailto:[email protected]