黎明（Leon）七場紅館演唱會前晚開鑼，即將45歲生日的他表演舞旗和勁歌熱舞，狀態甚弗，更向fans大送金牛和香吻。至於傳有BB的樂基兒，一身黑衣包到實在後台為Leon打點，又以女主人身份招呼好友，表現恩愛甜到漏。
一連七場《LeonXu演唱會》前晚在紅館展開，全場滿座，Leon甫出場台下fans已不停尖叫，相當瘋狂。近日盛傳Leon的老婆樂基兒有BB，日前她現身時穿上厚衣不時摸肚，孕味甚濃，雖然Leon和樂基兒未有回應，但現場見他的確心情靚絕。
JW露深長事業線
當晚Leon請來李思捷，陳小春和愛將JW做嘉賓，李思捷扮嘢王上身，扮盡三大天王劉德華、張學友和郭富城，之後Leon上台跟fans玩問答遊戲，抽中的fans只要答中即可得到1000元現金獎，答中後又可即場跟Leon合照，女fans獲偶像攬攬皆歡喜若狂。此外fans又可即場掟骰仔，掟中有Leon名字的一面，即獲他送上香吻，只可惜fans不幸掟中李思捷，Leon聞言即救fans說：「唔緊要，你可以送畀第二個。」最終fans也決定放棄這份「大禮」。
接着小春出場，他對着Leon說：「多謝老闆，唔係Leon我都唔知有冇機會再唱歌。」Leon聞言即笑說：「唔好咁講大佬。」兩人隨即合唱《友情歲月》。至於愛將JW更為老闆豁出去，穿上谷胸裝上陣，露出長長事業線撐Leon。
「破咗人生兩個紀錄」
為了今次演唱會，Leon特別操弗瘦身，在快歌環節他不但少有地表演連場勁舞，更表演舞大旗，功架十足，狀態果然弗到漏。尾聲Leon到台邊跟fans握手，再邊唱《我的親愛》，他足足握了15分鐘fans才肯罷休，他笑說：「今晚我破咗人生兩個紀錄，一個係有生之年唱得最長一次《我的親愛》，另一個係成口紙絮都仲要繼續唱。」
個唱甚少「安哥」的Leon亦破例唱到11點半，臨走前再表演幾下舞步，表現相當風騷。
採訪：胡比
攝影：陳志嵐
