外電報道，facebook準備搞上市，市值高達1000億美元，聽到都和味。人稱面書嘅facebook已經成為現代人其中一個主要溝通渠道，可惜祖國同胞唔能夠合法使用面書。
員工測試中
不過，冇嘢難到強國子民，內地網絡狂人、阿里巴巴（1688）主席馬雲近日就搞咗個祖國版面書，叫「來往」，網址係「laiwang.com」。
據了解，「來往」做緊內部測試，暫時只係畀阿里巴巴員工喺內部自己「來往」，相信遲早開放畀全國同胞。華華仲八到，「來往」主打移動社交網絡，即係話用智能手機就可以好方便咁上到，所以一出就會有iPhone同埋Android應用程式。睇嚟，內地同胞搭車時會更加忙碌。