祖雲達斯喺禮拜日意甲聯賽繼續保持不敗，主場對住切塞納有驚無險2:0贏波上返榜首。場波最令球迷緊張嘅唔係祖記踢到末段先至打開紀錄，而係老將迪比亞路俾對手踢中個頭。
迪比亞路中招後流到成面血，自然痛在fans心，擔心個靚仔樣有乜損傷。不過斑馬王子留院一晚後喺社交網站報平安，縫10針都係濕濕碎，soman！
專業態度坐冷板冇扭計
迪比亞路喺上個月踏入37歲，年紀大落場踢波機會係少咗，但冇變嘅係專業態度，一有機會落場就會「超人」般搏到盡，亦唔會因為坐冷板凳而諸多怨言。好似上個禮拜祖記作客逼和拿玻里場波，係迪比亞路職業生涯第700場球會比賽，但教練干地就只係畀佢踢短短3分鐘，波都幾乎冇得掂，難得係迪比亞路賽後都冇當係一回事。
講番禮拜日場波，祖雲達斯主場對住切塞納，冇咗停賽嘅派路，進攻上硬係爭啲。干地喺下半場11分鐘派迪比亞路入替胡仙歷，點知老金童奇兵就做唔成，落場冇耐一次同對手後衞馬高羅斯爭波嗰陣，俾對方一腳踢中個頭隨即爆缸；喺地下碌咗一輪之後終於頂唔順，由擔架抬出場，即使送院治理。
硬漢送院不忘安慰「粉絲」
迪比亞路左邊太陽穴附近踢到爆開咗，送院途中急救人員已經同佢縫咗8針，入到院醫生再加多兩針，迪比亞路話踢咁多年波有咩嘢大傷未遇過，呢次真係碎料。醫院方面穩陣起見要迪比亞路留院一晚檢查吓有冇腦震盪，結果一切正常放心晒。
迪比亞路有硬漢本性亦有柔情一面，怕佢嘅「粉絲」擔心，放咗張相上佢自己嘅facebook同埋留個言：「留院一晚都係穩陣起見，我情況完全冇問題！張相係我喺救護車上面影嘅，大家唔使心急，好快又會再見面。」
2006年祖雲達斯被罰降班，迪比亞路喺未有正式判決前，就已經義無反顧話落意乙踢都一定留低，喺祖記球迷心目中絕對係神級英雄。今季係老金童喺祖記嘅最後一季，求大俠都希望呢位真英雄臨走前可以攞多次意甲冠軍。
