茶餐廳內，孝順兒子與阿媽茶敍，兒子亂找話題同阿媽吹水，「新一屆特首，你想邊個當選呀？」阿媽呆望着兒子，別過臉輕嘆，「我哋呢種人，無所謂」「你係邊種人呢？」兒子忙追問，「舊式人！」兒子一臉茫然「舊式人跟邊位做新一屆特首，有何關係？」阿媽怔住，回憶播映機再次啟動，從前的一幕幕，再次重現眼前……
十五歲那年，阿媽被帶往「相睇」，坐在嘈雜的茶居中，阿媽看見兩位年近二十的男子，一個又高又瘦，膿瘡滿面，他看着阿媽的眼神，讓阿媽知道自己將會是他另一隻扭斷所有手腳，但仍在跳動的「蟋蟀」；而另一位又肥又鈍，卻在炫耀着自己有多聰明，他越是「認叻」，越顯得他有多「蠢」，有多討厭！然而這兩位惡頂男，其中一人將會與阿媽共度餘生，但她卻沒有選擇權利，她只可以選擇相信，當選的那一位，雖然就算會待她不好，但會繼續給她安樂茶飯就可以……
終於又肥又蠢但死認叻的肥仔當選，與阿媽共度了五十餘年，「我這種上一代舊式的人，一切都任由人擺佈，逆來順受，隨遇而安，從來無得選擇，但就成世都唔會有唔識揀的煩惱……」阿媽為自己有的福氣微笑，然後續說：「當你無得揀，你就唔會揀錯，有錯都係人家錯，更何況其實今日錯，聽日可以變對，人會改變進步，你老竇在生給我們飽飯，離開留低安穩，這樣負責任又謙厚的男人，邊個知道佢後生無鬼用，淨係識認叻？」
面對無得揀的選擇，我們只可以期望，惡劣的當選者，會慢慢改變進步！人生滿希望！
作者Profile
編劇、導演兼電台節目主持，認為「愛情」是沒有工作時的玩意，「工作」是沒有愛情時的必需。
作者：鄒凱光
逢星期三刊出