曼城粒粒皆星，做領隊嘅唔容易駕馭佢哋。領隊文仙尼就知道呢班反斗星唔易教，所以出怪招宣示權力；喺曼城周一操練期間，喺佢隻「一剔」鞋上面寫咗個「BOSS」字（圖），擺到明話畀班球星知要聽邊個支笛；不過，有老闆款唔等於叻晒，好似佢同日主持曼市聖誕百萬行嘅鳴笛起跑，但係㩒極都㩒唔到，搞到參加咗嘅朋友要天寒地凍下等成5分鐘。文帥，睇嚟你支笛唔多靈喎。