車路士領隊波亞斯啱啱證實，球會已同意前鋒安歷卡同後衞阿歷士洛里高嘅轉會要求。安歷卡由17歲喺阿仙奴踢出名堂，十幾年嚟踢過嘅豪門球會多到嚇親人，我求大俠對面相其實都有啲研究，睇安歷卡驛馬星動，加埋下巴飽滿，甚有大會命，睇怕下個落腳嘅球會又會係大球會。話口未完，即刻傳出利物浦有興趣翻兜簽呢位法國射手，繼續職業生涯豪門之旅。
職業生涯多盃落袋
安歷卡16歲仔就俾雲格睇中，使100萬鎊就將佢由巴黎聖日耳門撬咗過嚟，佢喺阿仙奴極速上位，成為兵工廠98年雙料冠軍嘅主要功臣。他額頭飽滿有少年運，所以職業生涯開始得咁靚仔，無耐就吸引到皇家馬德里重金禮聘，雖然踢咗一季，不過衰衰哋都叫做喺00年幫皇馬贏過歐聯冠軍。
皇馬之後安歷卡衣錦還鄉，返去母會巴黎聖日耳門。之不過安歷卡職業生涯驛馬星動，又點會可以喺祖家踢到老。01年尾聖日耳門將佢借去利物浦，不過當時紅軍領隊杜格利殊唔多鍾意佢，冇買斷佢。之後安歷卡踢過未發跡嘅曼城、土耳其費倫巴治到保頓，好似越踢越霉咁；之不過睇番佢面相，下巴都算飽滿，職業生涯最後階段唔會差。果然佢喺08年加盟車路士，到家贏過一次英超同兩個英足盃，雖然今季同波亞斯關係麻麻，家仲要求離隊，但安歷卡嘅豪門球會運仲未完，下一站點都唔會好似傳聞咁會去中超球會啩。安歷卡自己都透露肯定會喺1月走人，不過，去邊就仲要賣吓關子先：「我出年1月會去邊度已經少少眉目。車路士本身有自己嘅未來嘅計畫，作為職業球員我只可以接受。」
車仔收400萬鎊就放行
安歷卡今季後就約滿車路士，據講會方係咁易收番大約400萬鎊（約4,850萬港元）轉會費就放人。利物浦領隊杜格利殊都覺得呢個價位啱數，家紅軍除咗蘇亞雷斯外就冇乜前鋒識入波，1月俾少少錢簽安歷卡會係平靚正嘅選擇。
除咗安歷卡同阿歷士，亦傳出車仔連林柏特都想踢走，用佢作為斟介熱刺的莫迪歷嘅條件。但呢單嘢睇落成事機會唔多高，一來以老換嫩熱刺都未必睬你，二來我算一算生肖屬馬嘅林伯，龍年都冇乜轉工運。