【萬千星輝頒獎典禮2011之今日舉行】新一屆視帝視后今晚揭盅，原本封帝呼聲極高的鄭嘉穎，近日盛傳臨門撻Q敗給謝天華，令嘉穎信心大受打擊，大戰前夕惟有到酒店食自助餐狂擦生果甜品減壓。至於另一準視帝謝天華也因壓力致失眠，昨日他急急買麪包醫肚，效法嘉穎狂食減壓。
戰況激烈的《萬千星輝頒獎典禮2011》今晚8時半假無綫將軍澳電視廣播城舉行，在《萬凰之王》昨晚連播兩集大結局，以及無綫總經理陳志雲力撐的天時、地利、人和有利因素下，胡杏兒有望憑《萬》劇撼低《潛行狙擊》的陳法拉，穩坐視后寶座。
視帝方面，戰況可謂峯迴路轉，《怒火街頭》的Law霸鄭嘉穎本被視為頂頭大熱，但近日有傳無綫欲為謝天華主演的邵氏電影《潛罪犯》造勢，所以決定將視帝頒給《潛行狙擊》的Laughing哥謝天華，加上有份主演《潛罪犯》一片的吳鎮宇，今晚會在台慶頒獎禮頒發視帝獎項，令天華攞視帝傳聞甚囂塵上。
天華喫包街坊圍實
準視帝謝天華昨到小西灣出席「反斗車王玩轉聖誕」活動，對於攞硬視帝傳聞，他說：「每日都有唔同講法，未知嘅！」
對於嘉穎指鎮宇頒獎的話會打定輸數，天華笑說：「佢出席當然開心啦，但未必意味啲乜嘢！」不過天華承認感壓力並失眠，幸他忙拍新劇《女警愛作戰》冲淡了壓力。有指無綫讓他封帝為《潛罪犯》造勢，他笑言大家太有分析力，但他沒有這個想法。
天華昨日出席活動後即狂食減壓，他偕助手到小西灣一麪包店買麪包，更即買即食，其間被20、30名街坊包圍要求影相簽名，眾人又鼓掌為天華打氣，場面墟冚到猶如慶祝天華已攞獎一樣，令他冧到爆燈。買完麪包後，天華便驅車返回跑馬地寓所休息，準備今晚台慶大戰。
鄭嘉穎狂擦自助餐
面對隨時臨門撻Q輸給天華，嘉穎惟有狂食減壓。前日他出席馬鞍山活動後，即駕駛其寶馬偕經理人到尖東香格里拉酒店食下午茶自助餐。嘉穎走了好幾轉攞食物，十分肚餓，其間他多數取生果及甜品小點，由於食甜品有助減壓，估計嘉穎特意揀選甜品來紓緩爭視帝的壓力。
嘉穎逗留了半粒鐘後，便返回紅磡海韻軒寓所，至晚上8時許再返無綫，與準視后杏兒為新劇《怒火街頭II》拍通宵。記者問嘉穎大戰前夕心情如何？他故作輕鬆說：「心情一樣。」可擔心拍通宵拍到殘，以致今晚亮相頒獎禮一副殘樣？他苦笑說：「拍電視係咁㗎啦！」
杏兒喜獲志雲關注
杏兒前晚被問到有否緊張到失眠時笑說：「呢排好忙，今晚拍到聽朝6點，聽晚又要出席《萬凰之王》大結局，時間好密，唔敢諗太多。」可擔心今晚出席頒獎禮一副殘樣？她笑說：「已經殘啦！惟有化妝品搭夠啦。」有份操控生殺大權的無綫總經理陳志雲一直以隱名Eggzero玩微博，並關注杏兒而未有關注陳法拉，被指獲志雲暗撐，她說：「我唔相信有偏私。」
採訪、攝影：朱志聰、李志明、楊浩賢
萬千星輝頒獎禮帝后提名
最佳男主角
張智霖《魚躍在花見》
林峯《不速之約》
歐陽震華《不速之約》
陳豪《點解阿Sir係阿Sir》
鄭嘉穎《怒火街頭》
吳卓羲《團圓》
郭晉安《團圓》
陳展鵬《真相》
馬國明《紫禁驚雷》
馬浚偉《紫禁驚雷》
謝天華《潛行狙擊》
黃宗澤《潛行狙擊》
黎耀祥《法證先鋒III》
陳錦鴻《萬凰之王》
歐錦棠《誰家灶頭無煙火》
最佳女主角
胡杏兒《萬凰之王》
宣萱《萬凰之王》
楊怡《魚躍在花見》
汪明荃《居家兵團》
鍾嘉欣《點解阿Sir係阿Sir》
佘詩曼《花花世界花家姐》
江美儀《九江十二坊》
薛家燕《九江十二坊》
李司棋《OnlyYou只有您》
蒙嘉慧《OnlyYou只有您》
田蕊妮《誰家灶頭無煙火》
李詩韻《紫禁驚雷》
陳法拉《潛行狙擊》
徐子珊《潛行狙擊》
張可頤《法證先鋒III》
資料來源：TVB
