【本報訊】千呼萬喚，重炮新股周大福珠寶（1929）今日起正式公開招股。面對上市是為免「爭身家」的疑問，周大福主席鄭家純昨日揚言，自己現時已經是整個家族的「掌舵人」，一向被外界視為最高統帥、現年86歲的「彤叔」鄭裕彤會淡出。至於第三代何時接班，現年64歲的鄭家純放話說要「等廿年」：「起碼20年之後，至會到第三代，到時家族嘅董事會先會揀個人出嚟！」
記者：吳綺慧
負責統領今次周大福上市各大小事務的鄭家純，昨日透過視像會議在記者會上分享他的「心願」：「我一直以來嘅心願，係周大福可以一代傳一代，永世咁傳落去。只有將佢上市，先至可以達成呢個願景。」他說，上市後會有獨立董事及監管機構監察，可以令周大福的運作「更清晰」。
「我哋家族家好團結，我希望下一代、下兩代，都咁團結啦！管理上我父親（彤叔）已經少睇，主要係年紀問題，健康一啲都唔係問題…我已經接咗（手），係家族層面上嘅掌舵人。」鄭家純強調，自己會主理周大福兼整個家族集團至少長達20年，意即要做到84歲方言休，到時再決定第三代誰人接棒，昨日言談間隻字未提外界認定的熱門人選、正坐在他附近的長子鄭志剛。「你問我係邊個（第三代），我都唔知道，到時再選。」
「管治折讓」早在預期
至於周大福掌舵人廿年不變是否好事，該股是否「抵抽」，各股評人及財金界教授都有自己看法，有指市場早已對周大福管理層質素而作「管治折讓」。
周大福背後的股權分佈複雜而神秘。據招股書顯示，上市後周大福珠寶將會由一間英屬處女島註冊公司CTFHolding持股89.5%，然後再由CTFCapital持股74.1%，後者再由CYTFamilyHoldings（CYF）及CYTFamilyHoldingsII（CYFII）分別持有49%及40.2%，兩間公司的實益持有人自然是彤叔和鄭家純。但餘下約25%及10%的少數股東「去咗邊度」？文件則沒有交代。
今日公開招股 15日掛牌
對於這疑團，鄭家純一開始透露了少許端倪：「嗰啲主要係多年來嘅生意夥伴，一部份係親戚，好似我阿叔咁，就包括在內。」不過鄭家純「答到一半」，突然停了下來戴眼鏡，身處倫敦的他相信是看了隱藏在攝錄機背後的「溫馨提示」，故隨即封口：「好似因為法律問題，我唔直接講得喎！總之係非直接嘅家族成員啦！」
那最終控股公司為何要分開CYF及CYFII呢？他回答得更「妙」：「其實我都唔係好明白，呢啲係班律師自己創作出嚟㗎！」
周大福的公開招股將由今日起至本周四中午止，入場費4242.34元，本月9日定價，發售結果14日公佈，15日掛牌。
專家點睇純官掌舵
需一段時間觀察
豐盛融資資產管理董事黃國英表示，相信市場已對周大福管理層有作「管治折讓」。從過往新世界集團的管治可見，其拿揑和炒賣地產市道的能力較差，但周大福生意性質不同，需要第二套管理技術，需一段時間觀察。
唔好咁快判死刑
獨立股評人胡孟青表示，「好多嘢要喺公司上市後先至睇到。佢今次出嚟講，即係話嚟緊20年管理層都好穩定……以前純官喺新世界試過輸咗幾十億，所以市場可能對佢嘅信心有小小discount，但唔可以就咁判佢死刑。」
若懷疑能力勿買
浸大財務及決策學系副教授麥萃才表示，若果投資者對新股管理層的能力存在一點懷疑，都唔應該買入該股份。他個人佩服周大福管理層將公司發展到目前規模，但並不是同樣認同新世界集團的管理層。
