花園街排檔火災慘劇後，政客巡視Show不絕，由林D9開始，到唐唐CY，最新一個係林鄭月娥。我到今日仍唔明白，傳媒仍大幅報道呢類爛Show，唔通大家仲認為劏房係新鮮事物。振英一貫誠懇認為從增加建屋量入手，令樓價下調、租金下跌，解決劏房問題。
同佢眉來眼去的林鄭月娥，亦跟手巡視花園街，表明用半年時間完成巡查全港334幢舊樓，以示政府嚴打。林鄭之所以得傳媒歡心，係有原因，佢應係問責班子內最進入角色的政客。
煲呔內閣不少來自AO系統，難脫公務員思維，凡出狀況需要作政治表態時，都會先同常秘傾一傾，參詳一下出街的立場是否有漏洞，轄下部門是否有執行上困難，幾上幾落先至出街。呢種處事方式，係港英年代政務重執行力的傳統，由於殖民地政府認受性係靠Deliverables，即係實牙實齒，一係唔應承，講得出就一定做得到。
公眾支持官僚難推搪
公務員實幹之傳統慢慢變成保守，尤其在問責制推行之後，常秘向後縮，未做未諗就先SayNo，而局長出街立場最好係講咗等如冇講，以免承諾太多，尾大不掉，被立法會咬住唔放。
所以外界見到問責制推行，施政風格冇乜改變。惟獨林鄭最醒目，好似巡花園街表態嚴打劏房，相信冇同其他同事商量，半年內完成巡查目標講咗先，只要有公眾議會支持，官僚再難以用各種資源人手理由去推搪，在內外壓力下死死氣執行。
心水清者都知，新界丁屋僭建開打，加埋林鄭月娥要求高速巡查市區劏房，而強制入屋巡查法例又未通過，屋宇署點做？點收科？見步行步囉！
添馬男