模何佩瑜（Jeana）同組合Octobeez成員Hidy、Rika，噚日喺旺角為now芒果台宣傳，吸引唔少宅男喪影。Jeana噚日大騷佢嘅不倒胸，佢將件Tee嘅領位剪到最低，成條事業線飛晒出嚟，Jeana仲講笑話特別將兩個芒果放喺心口。
之前Jeana話同圍村男友感情有問題，問佢分咗手未？Jeana唔多想講，冇否認冇承認。另外，日前Jeana被踢爆喺大圍買咗兩個單位，提到呢件事佢扮儍話：「我有個男仔朋友喺英國返嚟，佢話想投資，所以我先陪佢睇樓。」
講買樓即轉話題
問到俾人篤爆係用自己名買樓，Jeana即刻轉話題，又話冇簽過任何文件。問係咪男方用Jeana名登記買嚟送畀佢做禮物？Jeana話：「我想佢送車畀我多啲，我想揸車。」對於收入同支出唔成比例，怕唔怕俾人話被包養？Jeana話：「梗係唔係，係都唔會搵我。」