臨近年尾，各大投行相繼為來年市況把脈。市場的共識為，明年經濟不但不會好過今年，而是會衰好多。既然後市基本面不樂觀，有大行索性暫時不替恒指明年目標範圍做預測。
翻查近幾個月有關港股的策略報告，分析員對來年恒指預測最淡的，暫時是要下試14000點左右，最樂觀亦只有22000點。大行目標從來欠缺準繩，但從多份報告思路分析及恒指目標而言，暫時是有睇淡無睇好。因此，就算睇淡睇得準，也請不要出來呈英雄，因為阿媽根本係女人，但有鬚就未必係老竇。講足幾年才實現，肯定唔係magic啦！錯過了中間的所有反彈，彈完千幾點就話仍會有反彈，然後再自命先知就叫做肉酸，簡直係衰過睇錯市。
市盈率指標變陷阱
假如現在有人膽敢走出來話明年港股要見28000點，樓價冇得跌，結果又被你Call中，閣下才是真正的先知，事先聲明，兩三年後才見28000點，唔算數！當然，真正的走勢會否再逆凡夫俗子而順先知思路而行，明年自有分曉。
明年比今年更困難，主要原因是滯脹問題。在增長低迷、成本卻持續高企情況下，企業更難轉嫁成本，本身毛利率只會每下愈況。分析股市，靠整體市場的估值比拼，參考市盈率高低。可惜，在滯脹或增長低迷的時期，市盈率指標可能是陷阱。
我們難再寄望重演09年V形反彈的神奇力量，雖然過去兩年經濟增長大致強勁，但套用自己經歷及整體社會情況，家庭或人均名義收入增長，已追不上物價升幅。故此，我們極有可能已經初步經歷了兩年的滯脹局面。經濟低迷或滯脹，是既持久而又具擴散性的病毒，可能最先是個人層面感受，繼而是企業以至整體經濟；所以，股市的估值亦很可能最遲才作出反映。
胡孟青
獨立股評人