米芝蓮星級餐廳名單又試出籠，香港有四間三星餐廳，唔知算唔算巴閉呢？四間之中，左丁山未去過Caprice，主要係訂位困難，要等好耐，至於啲一星、二星、三星是否真係咁好，左丁山只能講大家意見不同，難以統一，例如上星期到過文華扒房，主菜食法國黃猄（Venison），五成熟，十分美味，侍應本推薦食rare（近乎生食），但左丁山唔係幾敢食得太生，文華扒房與Pierre為何一個係一星，一個係二星之別？講食就分唔出嘞，大概係Pierre在頂樓有維港景，扒房在一樓啩。之不過，話雖說回頭，置地廣場之Robuchon與歷山大廈之82，一樣係冇風景睇嘅啫。
當日中午在文華扒房吃過鹿肉之後，晚上大賓架L請吃晚飯，佢話幾經辛苦，先至由後備名單補上有張枱，可說得來不易。是晚不見大家都相熟嘅經理丹尼羅，據講係上咗上海視察。不久之將來，就會在上海外灘半島酒店後開設上海分店喎，大廚Bombana（有個中文名叫做岑柏濤）在2010年先至開辦82（得林建岳大力支持），不到兩年時間，竟成為三星餐廳，快到不可思議，82係唔係好到冇得彈呢？咁又未必，起碼當晚左丁山食嘅主菜sea-bass（海鱸）就唔係一流水準，有改善空間，以左丁山偏見，食廣東清蒸海上鮮，始終係食魚最佳方法。
米芝蓮星級餐廳公佈後，幾位測量師大哥級人物到Caprice食午餐，有人感覺到與82相比，後者似乎更加好少少，既然Caprice顯示都係三星，以此作為基準（benchmark）、82今年成為三星餐廳，亦唔算得奇怪。
有記者打電話嚟問，鏞記冇咗一星，是否合理；講到粵菜，爭論較多，左丁山常到之鏞記（四樓）與陸羽現在都係無星餐廳，但食客不減，利苑酒家有幾間屬一星級連新城市（沙田）嗰間都係，不敢苟同，新城市利苑點同鏞記比呀？所有利苑之中，最好嘅一定係洗衣街舊舖，得到二星，係應該嘅。你問賓架L嘅話，佢話圓方商場內（包括酒店）冇一間餐廳合佢心水，所以成日走返中環覓食；之不過，有星就有商業價值，尤其係街頭巷尾嘅小店一登龍門，門口條排隊人龍可以長多幾十呎。