海通證券（6837）今日開始招股，公司董事長王開國噚日喺記者會賣花讚花香，指公司股票定價一啲都唔貴，佢話：「公司在A股年頭股價有十多塊錢（人民幣．下同），（歷史）最高到33元，近期只有八塊多。」
自稱價值被低估
佢又話，公司淨資產有450億銀，上市後會去到570億，仲有好多資產未計入，所以佢覺得公司股票被嚴重低估。不過公司唔會因市場波動更改上市計劃，所以「今次上市是給投資者送大禮，送紅包！」
究竟王開國係咪提早派利是畀投資者？睇返同行中信証券（6030），以上周五收市價13.92港元計，市盈率10倍多啲，海通今年預測市盈率就去到成廿倍，近期大陸證券業有幾好景大家心照，海通呢封利是，好大機會係硬嘢。