猿人題材拍過好幾次，新作《猿人爭霸戰：猩凶革命》實情改編自1968年經典作品。主角猿人，今時今日已由「零瑕疵」CG取代，Blu-ray上唔止有數到猩猩毛髮嘅高清靚畫，猿人空群出動發怒咆哮嘅低頻聲，直頭將家中Subwoofer榨到盡。碟未出街，《數碼達人》已率先攞到Sample碟，為大家實測一下呢班猿人有幾野蠻。
記者：陳國輝
收錄新舊版對照
究竟43年前嘅《PlanetoftheApes》，與今時今日嘅CG合成版有乜唔同？可能你同我都未睇過！但係，Bonus就收錄咗幾幕經典場面，等大家細心比較；例如一幕係成群猿人齊齊衝落山，由於電腦技術欠奉，莫講話演員要貼到成身毛，再親自扮演猩猩，就連一點兒CG也沒有。不過睇咁耐，其實都係想話你知，翻拍呢齣電影有幾大進步！
睇過新舊猿人，查實Bonus內仲有大量解構猿人嘅資料片段。多年前，科學家就為佢哋進行過智力測試，由1數到9，結果唔使幾秒即學懂生字，證明呢個世界唔係人類叻晒！另外，鍾意研究猿人的話，Bonus更將佢哋區別為幾類型，各提供詳細說明，另附資料圖片，唔講仲以為自己睇緊Discovery節目㖭！
毛髮質感好飄逸
今次推出咗普通以及珍藏版兩款，前者用單碟包裝，雖然後者都係，但首批200套附送限量版電影菲林，只供Fans收藏。若然你唔係粉絲，繼續欣賞CG仲好。不足120分鐘劇情內，你只會見到猿人嘅表情係幾咁豐富，毛髮幾飄逸，邊一部份係真實，邊一部份係CG，我就真係分唔到囉！至於音效上，佢支援DTS-HDMasterAudio5.1，特別一提係猿人咆哮嗰刻，低頻表現出極具震耳欲聾嘅氣氛，令呢班兩米高嘅人猿，拍得住暴龍咁有氣勢，不期然令觀眾望而生畏，當然亦好適合有靚Hi-Fi嘅人用嚟拆屋。
人猿激戰必睇位
《猿人爭霸戰：猩凶革命》BD
售價：$199（普通版）/$300（限量珍藏版）12月8日推出
特別收錄：猿人的神話特輯、刪剪片段、角色創作草圖欣賞、特技動畫製作過程等
