第一上海（227）跌到落金融海嘯價，殘到爆。第一上海08年海嘯價0.43元，現價（0.62元）唔係差好遠。第一上海股價咁殘，同大市橫風橫雨、證券業務不振有關。照睇，嚟緊2011年度亦未必靚仔得去邊。但要咁睇，第一上海價殘，現價相對NAV（1.9元），大幅折讓近七成，有咁厚嘅NAV墊底，冇有怕。又人行調降存款準備金率，阿爺開始放水，股樓應該開始活起嚟。長線睇，一啲好似外滙及金融政策，亦都係持續性開放，呢一點，就相當有利香江金融、證券業。07年，港股炒「直通車」，第一上海高見4.18元，買第一上海，博翻半番到0.92元，NAV折讓仲有50%過外，攞長線等好似直通車重大政策落實，第一上海股價，係可以放紙鳶。
橙天嘉禾現金牛
橙天嘉禾（1132）6月底淨現金2.3億銀，若果連埋Legendary和解協議現金回籠，淨現金應該上到4.5億銀，係集團現價市值一半水位，橙天嘉禾係現金牛。又集團現價（0.33元）貼住金融海嘯價，ChinaPlay當中，佢算殘，相對NAV折讓，亦達到38%，唔錯。呢轉短打，博橙天嘉禾升20%到挨近0.4元，未有耐上到NAV水位。
錢雋