近期挽救歐債嘅消息日日新鮮，其實家最怕唔係冇解決方法，而係各國輪住投票，間中又有阻滯，即使六大央行救市措施能夠拖延時間，但喺搵到防止歐債爆煲嘅方案之前，可能已有銀行頂唔順要爆煲，所以點講都仲係生死未卜。暫時睇唔出會有突破性進展，加上預咗12月個市唔易炒，無謂冒險吓吓博內銀、內房股，寧願搵防守性較強嘅股份，另外細注博吓低殘冷門股，都係唔錯嘅選擇。
天津發展（882）近年十分低調，畀人經營能力麻麻嘅印象，業務亦十分複雜，冇乜人留意。事實上，津發多年來主力發展嘅業務的確冇乜睇頭，年頭原本盈利貢獻穩定嘅公共設施業務，都因為政府改變補貼計算方法，搞到冇乜錢賺。至於酒店業務亦係蝕多過賺，旗下天津港（3382）同王朝酒業（828）都表現一般。
津發最有睇頭嘅資產，其實係持有16.55%嘅奧的斯中國業務，奧的斯係全球電梯及升降機業龍頭，中國業務就同津發共同持有，基本上津發每年就係印印腳等收錢。
電梯業盈利連升10年
近年內地房地產行業蓬勃，帶動電梯同升降機嘅需求，近10年奧的斯中國盈利每年都錄得雙位數增長。家個個驚內地樓價下跌，建屋需求下降，奧的斯中國的確面臨近10年最大考驗，但未來都仲有大量保障房會陸續推出，點都要用升降機，加上行業競爭冇建築、水泥咁劇烈，點計盈利都比較有防守性。
津發今年上半年來自奧的斯中國嘅盈利達2億元，佔整體持續營運業務溢利7成以上，預期未來盈利增長會繼續快過津發其他業務，但長遠就要觀察喺內房下跌周期時嘅抗跌力，總之要Mon實。
津發目前冇淨負債，市賬率0.46倍，唔計金融海嘯期間，目前估值處於近10年低位，相信12月內歐債唔出事，佢都冇乜水位下跌。美中不足係派息率低，往年派息比率只大約六分之一，長揸未必有肉食。技術上，津發股價上星期五出現第一支大陽燭，交投都有配合增加，短線可以小注跟進，目標價4.40元，跌穿大陽燭起步位3.65元即止蝕。
晉佳
本欄逢周一、三及五刊出