有記者致電留言想做一簡短訪問，我還以為又是甚麼剛出台的香港「米芝蓮」名店食評。我不好食，又唔似蔡東豪咁，話晒都係一間大班星店的股東（勢估唔到米芝蓮評審讀咗佢同大班篇訪問），只不過曾與好幾位名（兼嚵刁）嘴朋友共餐，給傳媒報道過，往後就經常收到飲食方面的提問。所以跟政圈中人交往，更要小心保持舒服距離。至於這次記者的功課，原來是問我有關公司明年的加薪和花紅情況。
因為國泰航空（293）早前宣佈，本港員工平均加薪5%，作為香港其一大僱主，聘用人數超過2萬人，且率先發佈加薪幅度，難免會成為人力市場的指標，亦為來年的薪酬走勢定調。而歷來硬淨並能充份展示工會實力的國泰工會，這次竟然見票即收，晒飯應，難免予人明年經濟會大逆轉，航運業必定首當其衝，所以勞方才會甘於就範。而工會領袖則表示，勞資雙方一開始就交出誠意，努力溝通才能達致共識，乜之前咁多年都冇咩？
大圍環境差 咪多要求
到底是天時還是人和才能玉成其事，其實一般市民並不關心，大家只係唔想過時過節的航班服務，會因談不攏的工潮而影響。而打工仔緊張的，肯定就是僱主消化了數據之後的反應。
至於我對記者的答覆就是：「公司仲喺商議討論當中，我哋會認真參照其他企業嘅幅度，亦會慎重考慮明年全球嘅經濟情況，當然需要配合當前嘅經營環境同自己嘅發展策略……」其實重點就係講咗等於冇講。不要以為這是公關辭令，而事實上我們並非跨國企業或本地大行，豈有能力主導薪酬趨勢，往往只有給人力市場牽着鼻子，可以亦步亦趨已屬萬幸，所以都真係要再睇定啲。
再者明年的經濟狀況着實叫人擔心，身為經營者需作好防風措施和變壞打算，但員工未必能夠同步預警，因此還得照顧好他們的期望：即係要畀佢哋知道，大圍環境唔就，千祈咪多要求！而根據過去經驗所得，患難之中就算見不到真情，但流失率幾可近零。
盧先亞