早排新盤混戰，單係信置（083）就一口氣連推逸瓏同天賦海灣兩個豪宅盤，後者嘅廣告，簡直可以用排山倒海嚟形容，以意大利男高音AndreaBocelli嘅《CantoDellaTerra》，托住把性感女聲，不斷喺耳邊「與生俱來……天賦……海灣」。單計廣告airtime都已經好落本。
營造鑽級寶地效果
講到落本，華華收到風，廣告雖然實景拍攝，但就老遠攞去海外做後期製作，仲搵咗荷李活班底出手，人氣美劇《Spartacus》就係佢哋製作。咁大陣仗，據聞係因為要做到好多粒鑽石滙聚成一塊寶地嘅效果，突出樓盤座落嗰塊地有幾矜貴。心水清嘅朋友應該記得，呢幅白石角地皮當年創出新界區地皮新高成交呎價紀錄。
據聞信置主席黃志祥對廣告頗滿意，呢個可能係點解個廣告日播夜播嘅原因。華華認識一位開廠嘅老闆，都係睇咗個廣告，先留意到呢個盤，後尾仲扑槌買咗個單位。