彤叔鄭裕彤旗下嘅周大福珠寶（1929），係珠寶業龍頭大佬，一年做成幾百億生意，今日正式招股，股票編號「一嚿二嚿」，相當好記！有接近周大福嘅人同華華講，負責推動今次上市嘅主席鄭家純，視周大福為「洗底」之作，希望可以省番靚個招牌。
順水推舟「問投行」
唔知係咪純官求表現心切，噚日記招，有外國記者用英文提問，負責主持嘅投行主管好體貼咁想話幫大家繙譯，純官透過視像會議越洋搶答，「得、得、得」三聲，截停咗banker繙譯，然後用緩慢但好清晰嘅英文回答，慳番各位時間。
咪以為純官吓吓都搶問題答，其實佢留番唔少空間畀banker「發揮」，例如當記者問到「預測」、「估值」、「加碼發售」之類嘅問題，純官三度叫記者完咗記招後，自己走去問投行，一招順水推舟，出神入化，純官表現果然進步好多。