爆升千點過後，港股於萬九關水平整固，靜待明日歐元區財長會議。熊證街貨漸增，上周五牛熊證十大成交中，熊證佔7隻，仲要頭3隻都係熊證，如此一面倒的情況下，後市再挾上機會大，博反彈可參考100日線（現處19562點）；再進取啲，就睇保歷加通道頂部（現為20090點），但魏力相信二萬關前會行人止步。
睇勻各個板塊，並冇邊個特別強勢，但內地電訊設備股防守性較高，會吸引避險資金流入，加上年尾將至，基金傾向揸穩陣股，安心部署下年策略。而該板塊穩中求勝之選，非中國無線（2369）莫屬。
本欄11月7日曾作推介，當時報1.45元，5個交易日後高見1.93元，勁升33%，其後反覆回落至1.50元水平。近日以「圓底」回升，交投又見活躍，可上車翻兜，先上望保歷加通道頂部1.87元，博賺13%。
上月中旬，有內地傳媒報道，通訊業十二．五發展規劃將於年底前出台，投資規模達2萬億人仔，重點力谷通訊服務及手機製造業，致力令智能手機普及化，中國無線係主要受惠者之一。公司轉搞高檔智能手機，並開發雲端運算服務，發展潛力大，並有助毛利率回升，明年業績應大有改善。
魏力