港股上周五繼續企穩萬九關，多國央行做嘢打亂淡友部署，相信短期個市唔會跌得落，趁有鑊氣繼續揸實鑊鏟炒。福田（420）早排公佈業績，因盈利唔對辦惹來洗倉潮，近日股價已企返穩，後市有力炒一轉。
截至8月底止，福田全年少賺5.8%，至2.1億銀，毛利率收窄0.9個百分點至15.3%，集團指因期內棉花價格急劇波動所致，但各路英雄似乎唔多受落，瘋狂掟貨，試過單日大跌10%。睇返福田盤數，長短債共22億銀，家阿爺重開水喉，呢隻主打中國業務嘅紡織股，財務壓力肯定會減輕，現價PB只係0.27倍，市盈率3.7倍，作為一間有盈利在手兼有息派嘅企業嚟講，實在平得可憐。觀乎近期棉花價格明顯喘定，福田業績嚟緊亦有望企穩。
福田上周五收報0.98元，可小注跟進，目標睇升一成，跌穿0.92元止蝕，話唔定好似上周一推介嘅盈進（1386）咁，有意想不到嘅效果。
唐牛