呢期潮人興玩飄浮，想影張得意有趣嘅飄浮相，要識跳，又要環境配合，最緊要係掌握時間。EX-ZR200主打高速，憑佢1秒30張高速連拍，由起跳到落地，每個動作都捕捉晒，影飄浮可謂零難度！
記者：韓繼聰
攝影：劉永發
Model：Hailey@GME
1,610萬像高速靚拍
一般數碼相機1秒10格已經算勁，不過呢部CasioEX-ZR200以「高速」做賣點，實力當然唔止咁簡單。憑住佢嘅EXILIMEngineHS雙核，輕易做出1秒30格極速連拍，仲要張張相都有成1,610萬像！無論影飄浮定其他動作畫面，喺你半按快門時已經開始進行預拍，每個動作都無走雞。30張相，總會揀到一張「飄」得最靚出嚟。
佢唔止連拍夠快，0.27秒嘅拍攝間距同埋0.14秒高速自動對焦亦係佢嘅殺着！攞上手試影，基本上0.27同0.14都只係數字遊戲，只可以話你知完全唔使等，感覺爽快！要雞蛋裏挑骨頭，就係連拍後需要長啲時間處理，但30張1,610萬像素相片，要多啲時間都無可厚非！另外拍片方面，ZR200提供咗240、480甚至1,000fps高速錄影，拍出嚟嘅慢速效果十分過癮，真係不能不讚吓佢嘅處理速度。
扮淺景深影沙龍
礙於機身設計，細機仔基本上無可能做到淺景深效果，既然硬件上唔可行，就以軟件補救。ZR200新增一按散景模式，可模擬出前清後矇嘅淺景深效果，經試拍，發現背景真的非常「散」，雖然有點誇張，但以模擬效果來說，也算不錯。而超廣角模式，則分別可選18mm或14mm，用家只需跟指示移動相機，便會自動拍下多張相片並進行合成，拼合非常好的廣角相。18mm只需左右移動，一玩即上手，但14mm就要多方向移動，實在需要多啲練習先可成功。另外亦設360度全景、HDR、HDRART等功能，佢可將影像化成油畫質感，除可設三級強度，亦可以此模式拍攝影片，玩味十足！再加上24mm至300mm的12.5倍光學變焦鏡頭，影遠近皆宜。總之機仔細細，功能多多，玩嘢一流。
試相
CasioEX-ZR200
感光元件：1,610萬像1/2.3吋CMOS
鏡頭：24-300mm（F3.0-5.9）
屏幕：3吋
查詢：捷成（29262300）
