愛睇書，但心底裏常有一個變態的想法，想將自己書櫃裏的書通通都拋掉，因為唔知點解，書店裏的書好好睇，便利店的書更好睇，包了袋不能開的書最好睇，自己書櫃裏的書呢，唔會睇。
於是替自己定下一個睇書規則，就是只要睇完之後記得書中一句金句，或一個道理，這本書就可以叫做睇完，可以送人或放棄。
唔係講笑，就算我要求如此低，揭返以往的藏書，經常有「究竟睇咗未」的疑惑，甚至我發現藏書裏竟然有同一本書出現了兩次，即是話冇印象到唔記得買了，再買過。
如果書是一個人，他一定很討厭我，因為我一係就當他隱形，但若果係近期熱捧、愛不釋手的，我會摺書、寫感想、畫符號、改標題，甚至最後會撕開幾頁幾頁來睇，情況拍得住《天與地》裏食人的劇情。
有愛書的朋友聽過或見過我的惡行，都嚇得大呼小見，而他們對書的愛之深，是會為他包書紙、配以靚靚書籤，還有香水味那款，若果被他們知道我曾經將他們的愛書帶入廁所，恐怕會絕交。
小時愛看小說，畢業後卻偏好工具書，就是因為覺得睇書時間長，所以最好有回報，所謂回報，就是做人處事的金句道理方程式，大概是只有如此才能滿足我的睇書規則，但這也可能解釋了為乜我的藏書堆積如山，老是提不起勁去看。
前陣子看了一套《潛逃時空》卻突然有點刺激作用，戲橋其實只有一句「時間就是金錢」，若果這是書名恐怕那本書已經給你拋到床下底，但以愛情貧富科幻來包裝，那兩小時的過程卻是反思良多。
睇波的結果重要，但過程才是戲肉，昨天收到堅哥蔡文堅的短訊，經過大半年的努力，他終於出院了，可以回家繼續復康的療程，非常懷念堅哥講波時口中肉緊的「孟聯」，和完場後的V字手勢，等住再聽同再睇！
堅哥，你知我用左手寫字，而我的右手，此刻也舉起了兩隻手指，這個勝利手勢，送給你和堅嫂！
文：keyman